15,00€
DOI: https://doi.org/10.55714/BAT-135 PDF eta EPUB formatuetan eskaintzen da.
, Ane Ortega Etcheverry
DOI: https://doi.org/10.55714/BAT-136.1
Hizkuntza gutxitu bateko hiztun aktiboa izateko edo bihurtzeko hizkuntza-gaitasunaz aparte,
bestelako hainbat faktore indibidual eta sozialek ere berebiziko garrantzia dute, besteak
beste, hiztunaren hizkuntza-gaitasunaren autopertzepzioak, testuinguru soziolinguistikoak,
harreman sareek, erabilera-ohiturek, arau sozialek, hizkuntza-jarrera eta ideologiek, etab.
Faktore horien guztien kontzientzia garatzea giltzarria da minorizazio zein desoreka sozialeko
egoerok gainditu zein eraldatzeko (Ortega 2024). Artikulu honetan hizpide dugun ikerketa-
proiektuan euskararen aldeko mudantza-prozesuak sakonean ikertu ditugu, eta horiek
bideratzeko kontzientzia soziolinguistiko kritikoa garatzeak duen garrantzia aztertu dugu.
Horretarako, oinarri etnografikoa duen Ikerketa Ekintza Partehartzaile bat aurrera eraman dugu
unibertsitateko ikasle gazteekin. Ikerketak aditzera eman du kontzientzia soziolinguistikoa
lantzea emankorra dela gazteon euskararen aldeko mudantza ibilbideak abiatzeko; izan ere,
hiztun gisa duten subjektibitatea ezagutzeko, inguruan duten ordena soziolinguistiko ez berdinzalea
hobeto ulertzeko eta beraien agentzia indibidual eta kolektiboa garatzeko balio baitie.
Artikuluan agentzia nozioan sakonduko dugu. Zehazki, gazteen mudantza-prozesuetan
agentziak zein ezaugarri garatzen dituen aztertuko dugu eta, modu horretan, minorizazio
etnolinguistikoko testuinguruetan agentzia garatzeak zer esan nahi duen hausnartuko dugu.
Hitz gakoak: Kontzientzia soziolinguistiko kritikoa, agentzia, hizkuntza-mudantza, gazteak,
ikerketa-ekintza partehartzailea.
PDF eta EPUB formatuetan eskaintzen da. , Miren Artetxe Sarasola
DOI: https://doi.org/10.55714/BAT-136.2
Hizkuntza gutxituen testuinguruetan garrantzitsua da hizkuntza-kontzientzia kritikoa izatea,
are gehiago erreferente linguistiko izango diren horien kasuan. Horretarako ahalegin bat
da, hain zuzen ere, orriotan aurkezten duguna. Irakasle izateko ikasketak egiten ari diren
ikasleak izan dira esku-hartze ikerketa honetako parte-hartzaileak (UPV/EHUren Donostiako
campusean Lehen Hezkuntza ikasten hasi ziren 120 ikasle). Eta, besteak beste, hizkuntza-
kontzientzia kritikoa garatzeari begira diseinatutako Murgiltze Astean parte hartu zuten
2024-2025 ikasturtearen hasieran. Orriotan esku-hartzearen nondik norakoen berri ematen
da, batetik; bestetik, esku-hartzean zehar galdetegien bidez jasotako emaitzak aurkezten dira.
Emaitzetan ikusi dugunez, Murgiltze Astea baliagarria izan da bere neurrian, baina komenigarria
da honelako esku-hartze baten diseinua gradu osoa barnebiltzen duen plan zabalagoarekin
osatzea. Gako-hitzak: Hizkuntza-mudak, hizkuntza-kontzientzia kritikoa, esku-hartze ikerketa, unibertsitatea.
PDF eta EPUB formatuetan eskaintzen da. , Marta Quintas-Quintas, Eneritz Garro Larrañaga
DOI: https://doi.org/10.55714/BAT-136.3
Artikulu honetan Mondragon Unibertsitateko irakaslegaiekin gauzatutako Huhezi Kulturala
izeneko esku-hartzea eta horrek haien profilaren garapenean izan duen ekarpena aurkezten
dira. Euskal kulturaren ezagutza eta eragiletza ardatz dituen proposamen co-curricularra da,
hiru fasetan egituratua: lehenik, irakaslegaiek euskal kulturari buruzko ezagutza zabaltzen
dute; bigarrenik, sortzaile edo antolatzaile gisa jardunez, euskal kulturan eragile izatea esperimentatzen
dute; eta hirugarrenik, ekimenak haien profilaren garapenean izan duen eraginaz
hausnartzen dute. Esku-hartzearen ebaluaziorako, irakaslegaien ahotsa jaso da galdetegi
misto baten bidez. Emaitzen arabera, parte-hartzaileek adierazi dute Huhezi Kulturalak
ekarpena egin diela euskal kulturaren ezagutzan sakontzeko, eta irakasle-profila osatzeko
hiru ezaugarri pertsonal garatzeko: (1) euskararen eta euskal kulturaren transmisioan eragile
aktibo izatea, (2) taldearekiko konpromisoa garatzea, eta (3) frustrazioa eta ziurgabetasuna
kudeatzeko gaitasuna lantzea. Hitz Gakoak: euskal kulturan ezagutza eta eragiletza, irakasleen hasierako prestakuntza, esku-
hartze co-curricularra.
PDF eta EPUB formatuetan eskaintzen da. , Maite Garcia-Ruiz
DOI: https://doi.org/10.55714/BAT-136.4
Artikulu honek BAM Irakasleen Unibertsitate Eskolako lehen mailako ikasleekin 2023-2024
ikasturtean egindako esperientzia pilotua azaltzen du, haren helburu nagusia ikasleen kontzientzia
soziolinguistiko kritikoa piztea izanik. Proiektua Amorrortuk, Gorigolzarrik eta
Ortegak (2021) egindako ikerketen jarraipen gisa diseinatu zen, metodologia parte-hartzailea
erabilita. Hiru sekuentziatan antolatutako dinamikak norberaren hizkuntza-biografia,
testuinguruaren garrantzia eta hizkuntza-praktikak aldatzeko saiakerak landu zituen. Esperientziak
erakutsi zuen halako prozesuak baliagarriak direla hizkuntza-hautuen eta ohituren
ostean ezkutatzen diren aldagaiak azaleratzeko, eta baita muda-prozesuak erraztu edo oztopatu
ditzaketenak ere. Hitz gakoak: hizkuntza-muda, kontzientzia soziolinguistiko kritikoa, irakasle-ikasketak, hizkuntza-
hautuak, euskararen erabilera.
PDF eta EPUB formatuetan eskaintzen da.
DOI: https://doi.org/10.55714/BAT-136.5
Ikerketa honetan jatorritik gaztelaniaz hitz egiten duten Gipuzkoako etorkin latinoen integrazio
soziolinguistikoa aztertu da. Datu-bilketarako metodologia kualitatiboa erabili da; elkarrizketa
sakonak egin dira, etorkinen generoa, adina eta lan-esparruko aldagaiak kontuan
izanda. Azterketan arreta jarri da immigrazioko biztanleen eta harrera-lurraldearen hizkuntza-
aldagaietan, integrazio soziologikoaren fase guztietan horiek duten eragina ulertzeko.
Hots, aztertu da Gipuzkoako testuinguru elebidunean zein izan diren integrazio linguistikoa
gaztelaniaz edota euskaraz egiteko etorkin latinoek izan dituzten aukerak eta moduak.
Hitz gakoak: immigrazioa, latinoak, integrazio soziala, integrazio soziolinguistikoa.
PDF eta EPUB formatuetan eskaintzen da.
DOI: https://doi.org/10.55714/BAT-136.6
Jakina da Nafarroan euskal komunitatea eta erdal komunitatea egoteaz gain, gatazka nazionala
ere badagoela; eta gatazka horretan kokatzen dela euskara. Hala, espainiar nazionalismoaren
-non nabarrismo politikoa kokatzen den- eta euskal nazionalismoaren arteko gatazkak
euskararen dimentsio politikoa eraikitzen du, eta horrek euskararekiko jarreretan zein
hizkuntza-komunitateen arteko kohesioan eragiten du. Ikerketa honetan Azagrako DBHko
irakasleen euskararekiko eta euskararen irakaskuntzarekiko jarrerak aztertu dira, hezkuntza
-sistema erreprodukzio sozialerako erakundea delako. Finean, DBHko irakasleak erreferentziazkoak
dira (aurre)nerabezaroan, eta, beraz, euren jarrerek eragina izango dute hurrengo
belaunaldien jarreretan eta nafarren arteko kohesioan. Gako hitzak: jarrera linguistikoak, hizkuntza komunitateak, nazionalismoak, euskara, Nafarroa.
PDF eta EPUB formatuetan eskaintzen da. 
